1.498ff: Apollo sees Daphne

...videt igne micantes
sideribus similes oculos videt oscula quae non
est vidisse satis laudat digitosque manusque
bracchiaque et nudos media plus parte lacertos;
si qua latent meliora putat. fugit ocior aura
illa levi neque ad haec revocantis verba resistit:
'nympha precor Penei mane! non insequor hostis;
nympha, mane! sic agna lupum, sic cerva leonem,
sic aquilam penna fugiunt trepidante columbae,
hostes quaeque suos: amor est mihi causa sequendi!
me miserum ne prona cadas indignave laedi
crura notent sentes et sim tibi causa doloris!
...nescis, temeraria, nescis
quem fugias ideoque fugis mihi...'

8.159-68: Daedalus builds the Labyrinth

Daedalus ingenio fabrae celeberrimus artis
ponit opus turbatque notas et lumina flexum
ducit in errorem variarum ambage viarum.
non secus ac liquidis Phrygios Maeandros in arvis
ludit et ambiguo lapsu refluitque fluitque
occurrensque sibi venturas aspicit undas
et nunc ad fontes, nunc ad mare versus apertum
incertas exercet aquas: ita Daedalus implet
innumeras errore vias vixque ipse reverti
ad limen potuit: tanta est fallacia tecti.

14.55-8: Circe poisons Scylla's pool

hunc dea praevitiat portentificisque venenis
inquinat; his fusis latices radice nocenti
spargit et obscurum verborum ambage novorum
ter noviens carmen magico demurmurat ore.